Bial Inkhawmpui 2024-in a lo remtih tawh angin ni 15.06.2025 (Chawlhni) chawhma inkhawm inkhawmah Tual Upa thlanna neih a ni a. Bialtu Pastor, Rev. C. Lalchhuanawma chairman niin inthlanpuitute chu – Upa TL Haungura, Upa Lalnghinglova, Upa Lalnilena leh Upa Lalthangvunga Sailo an ni a.
Tantu Pu R. Lalrinawma niin NPSS zirtirtute leh Senior Department ten biak inpui an luh fel hnuah Tual Upa thlanna hun buatsaih a ni.
Chawhnu inkhawmah Bialtu Pastor chairman niin Pi Lalhmingmawii tantu a ni a. Upa Lalthangvungan inthlan result puangin Tual Upa atan mi pahnih – Pu Robert Vanlalhruaia leh Pu V. Rothangpuia te thlan tlin an nih thu a puang a. Tawngtaisakna a neihsak hnuin anni pawh dawhsan lama thu turin chairman-in a tih angin an thu kai chho nghal a. Upa TL Haunguran thu sawiin kohhran hoten tluang taka Tual Upa pali thlang tura pahnih kan thlang chhuak thei chu lawmawm kan ti hle.
