Report Petu: Pu R. Lalhriatpuia
Kabuganj kohhran ten biak in thiat a work camp nei tur leh kum thar lama Presbytery huap thalai inkhawmpui an thlenna tur pual a sumtuak nan jumble sale khawn khawm sak a tanpui tura min rawn ngenna chu kan Kohhran Committee chuan min ngen ang hian tihhlawhtlinsak ngei ni se, a ti a. Work camp bik hi Ramthar committee ten lo buaipui se, jumble sale hi Kohhran Hmeichhia ten lo buaipui se a ti a. Kohhran Hmeichhia te hian thawmhnaw tam tham tak an khawnkhawm a, Work Camp nei tur hian heng mite kan kal thei a ni.
- T. Upa V. Rothangpuia
- Nl. C. Vanlalzawni
- Pi Lalthliri
- Pu Lalrawngbawla
- Pu F. Hmingthansanga
- Pu Ch. Vanlalringa
- Pu F. Thangkhuma
- Pu K. Lalzika
- Pu R. Lalrohlua
- Pu Lalsiamthara
- Pu Laltlankima Ralte
- Pu Lalnunpuia
- Pu C. Chawnglianzuala
- Pu R. Lalhriatpuia
Kabuganj bial hi kum 1999 khan din a ni a, Pastor pariat an awm tawh a, station hi pariat an awm a, Missionary Nurse hi 2 awmin Craft Teacher 1 leh Missionary Evangelist hi 3 an awm mek a. A ram mi field worker hi 7 leh Kross Sipai 10 an awm mek bawk a ni.
Bial chhungah khuan ringtu 200 vel an awm mek a. Kabuganj kohhran bikah khuan member 28 an awm a, chhungkua ang zawng chuan chhungkaw 5 chiah an awm a. Kohhran member tlem te ni chungin biak in thar sa turin theih tawp an chhuah a ni.
June 23 (Thawhtanni) zing dar 6:30 khan Kohhran hall kawt atangin sumo pahnihin Kabuganj lam kan pan a. Kohhran Secretary leh Ramthar Committee chairman-in tawngtaina in min thlah a, tluang takin chawhnu 1:45 khan Kabuganj kan thleng thla a ni.
Kan thlengthla hi minlo lawm thiam khop mai a, thawktu awm ang ang te an lo kalkhawm a, zanriah ei turte minlo buatsaih sak a, an pastor-in lawmthu sawi tawngtaina a hmang a, kan thawmhnaw te kan in dah fel hnu chuan, kan theih chin chin thawk nghalin, inchung rangva pawh enge maw zah kan thiat hman a. Zanriah eikhamah thawktute nen inhmelhriattirna leh Pathian hnena inhlanna hun hmangin tawngtai rualna te kan nei a ni.
Kabuganj Biak in khu a dung ft. 54 leh a vang ft. 36 chhawng hnih a ni a, Biak in pangai tak a ni a.
Khua a lum khop mai a. Kan hruaituten kan hnathawh dan tur ruahmanna siamin. Zing dar 6-ah thingpui kan in a, thingpui in zawh atang hian chawhma dar 11:00 thleng kan thawk tlang a. Dar 11:00 ah chaw kan ei a, chhun nisat zual lai chu kan chawl a, tlai dar 3 ah kan thawk tan leh a, zan dar 7 thleng dawn te kan han thawk leh a, dar 7:30 vel bawrah chaw kan ei leh thin a. Zan mut dawnah kalkhawmin hla pahnih te kan sa a, tawngtairualna hun kan hmang thin a. Hetiang hi nitin a kan hun hman dan chu a ni a. Chhun lamah hian bial huap hnatlang te kovin, mi 10 vel bawr hi an rawn thawk chhuak thin a. Anni pawh hian an thawk hlawk thin khop mai a, theih tawp kan chhuah tlang a, hna pawh hi kan thawk sawt viau a ni. Hnathawh lamah hian harsatna kan tawk lem lova, khawlum hian min tibuai lek lek zawk a, Mizoram ai chuan alo lum deuh a, khawlum bawl leh thak hi thenkhat hian kan han nei deuh a, mahse hnathawh tibuai khop chu engmah kan tawng lo.
June 27 (Zirtawp) zanah thawktute nen inkawmhona leh tawngtaina rualna hun kan hmang a, Hetah hian Kabuganj kohhrante hian Gamchha pakhat theuh min present a, Tin, T.Upa V Rothangpuian a tul ang ang a an lo hman atan a kohhranin a pek Rs.10,000 hlanna hun a hmang bawk a.
June 28 (Inrinni) zing dar 6:30 khan kan rawn chhuahsan a, tluang takin chawhnu dar 2:30 khan kan rawn thleng leh a ni.
Thil lawmawm deuh chu, “Mahni kal ve thei lo mah ila, ka hmanrua tal hi lo kal ve rawh se,” tiin mi pali ngawtin an hmanrua min kentir a, a lawmawm khop mai. Kan tangkaipuiin hna pawh kan thawh sawt phah viau a ni. Intihpalh theihna tam tak awm karah buaipui ngai khop a, intipalh kan awm miah lo kha a lawmawm tak zet a.
Slab hi tlemte thiah zawh hman loh kan nei a, a bak chu kan thiah theih ang ang chu kan thawk zo hman a, thahnem kan ngaiin hna hi kan thawk sawt khawp mai a. Anni lam pawhin lawmthu min hrilh ve mawlh mawlh a ni. Kohhran hoten rawng kan bawlna hi Pathianin mal a sawm ang a, khulai hmunah khuan biak in tha tak a ding ngei ang. Hmabak tam tak anla neih avangin Kabuganj kohhran lam pawh i tawngtaipui zel ang u.
