Ni 31 March 2024 Easter Sunday Chawhma Inkhawm tan hmain ruah a sur chiam a, kohhran mipui inkhawm kan thahnem loh a hlauhawm viau lain inkhawm kan tha hle a, a lawmawm takzet a ni. Upa R. Lalhmingthangan inkhawm hruaiin Pi Lalhlimpuii tantu a ni a. Kohhran Zaipawl zai nung tak kohhranhoten kan ngaithla a, a manhla kan ti hle. Upa Silianan thupui awm sa ‘Thawhlehna thu chu thu mai maiah an ruat’ tih a sawi a. Inkhawm banah kohhranhoten thingpui ruai kan theh a ni.

Ni 29 March 2024 Good Friday Zan inkhawmah Upa F. Lalfakzualan inkhawm hruaiin Kohhran Zaipawl leh Kohhran Pavalai Pawl Zaipawl ten hla an rem a. Kan pastor, Rev. C. Lalchhuanawma hnen atangin thupui awm sa ‘Thlanah an zalh’ sawiin inkhawm banah lengkhawm a awm a, Nl. K. Lalduhawmin a kaihruai a ni.

Ni 29 March 2024 Good Friday Chawhnu Inkhawmah Meeting Chairman Upa H. Lalthankhuman inkhawm hruaiin Pi Saizami Sailo tantu a ni a. Pu Ramhmangaiha Ralte hnen atangin thupui ‘He mi hi Pathian Fapa a ni ngei mai’ a sawi a, Senior Department ten Pathian fakhla mawi takin an sa bawk a ni.

Ni 29 March 2024 Good Friday Chawhma Inkhawmah Upa R. Lalropuia, Kohhran Secretary chu inkhawm hruaitu niin Pi Lalchawimawii (6) tantu a ni a. Kohhran Zaipawlten Pathian fakna hla remin Upa H. Lalthankhuma hnen atangin thupui awm sa ‘Isua Krista hi engtinnge kan tih tak ang le?’ tih kan ngaithla a. Chawhma Inkhawm banah kohhranhoten thingpui leh a hmeh kan changho a ni.

Ni 28 March, 2024 hian kan Lalpa Isua Krista thihna tawrhpui hapta kohhranhoten kan hmang tan a. Zan Ven Inkhawmah Lalpa Zanriah Sacrament chu Rev. C. Lalngaihthanga, MTC-in a theh a. Kohhran zaipawlten hla mawi takin an rem bawk a ni.