Vawiin ni 14.01.2024 Republic Veng Kohhran Biak In chawhnu inkhawmah kan bialtu pastor thar, Pastor C. Lalchhuanawma induction programme hman a ni. Inkhawm hi Rev. RC Lalnghakliana, Director, Revival chuan inkhawm a kaihruai a, Upa Lalthakhuma, Secretary (Sr.)-in pastor thar chanchin a sawi a. Chairman-in induction zawhna zawtin Upa K. Darthanga, Bial Chairman-in a chhang a. Bial Zaipawl ten Pathian fak hla mawi tak an sa bawk a ni.

Fuihna leh duhsakna Chairman-in sawiin Pastor C. Lalchhuanawma hian thu a sawi a. Upa Siliana, Republic Vengthlang chuan lawmthu sawi leh tawngtai sakna hun a hmang a ni.

PASTOR C. LALCHHUANAWMA CHANCHIN:

Pastor C. Lalchhuanawma hi Pu C. Rozama leh Pi Zoliani te fa niin Varanasi, Uttar Pradesh-ah kum 1967 khan a piang a. Unau pali niin, mipa pakhat leh hmeichhe pathum an ni. Thiamna lamah B.A leh B.D niin Pi Lalramhluni nen inneiin fa pathum an nei a, chungte chu: C. Lalrinlawma, C. Lalthathluanga leh C. Lalhmingmuani te an ni.

Kum 1997-1999 khan Kawrtethawveng Pastor Bial-ah Probationary Pastor niin, kum 1999 khan Pastor atan nemngheh a ni. Heng bialah te hian pastor-in a awm tawh a ni: Keitum, Aibawk, Kolasib Hmarveng, Mamit Hmunsam leh Champhai Kahrawt te a ni.

January 11, 2024 (Ningani) hi Mizoram Presbyterian Kohhran Din Tan Ni a ni a. Republic Vengthlang Kohhran chuan Kohhran din tan ni hi zanah Pathian biak inkhawm neiin kan hmang a. Pi Lalremmawii’n inkhawm tanna hun a hmang a, Upa R. Lalropuia, Kohhran Secretary-in thupui “Mizoram Presbytrian Kohhran leh Khawtlang inrelbawlna”, tih sawiin Kohhran Zaipawl ten KHB 399 ‘Lalpa, I rawngbawla min koh hi,’ tih hla an rem a ni.

Kum 2014 Synod inkhawmpui vawi 91-na rorel minute pg. 58, No 58-ah ‘Mizoram Presbyterian Kohhran din kum tih chian thu’ tih thupui (2013 Synod Gen. 1, Sec 250.9, Sec 252.9)-ah Synod Executive Committee in zirchinna an thlen chu thir ho niin, Kohhran din kumah 1894 January 11 chu ppwm a ni. Presbyterian Kohhran din tan ni atan January 11, 1894 pawm a nih hnuah kum 2016 Synod Inkhawmpui chuan “Mizoram Presbyterian Kohhran din tan ni hi Synod Ni pawimawhah telh ve ni rawh se” tiin a rel a, thurel chu SEC-in a lo bawhzui turin a dah a. SEC chuan “Mizoram Presbyterian Kohhran Din Tan Ni, January ni 11 hi kum 2018 atangin hman tan ni sela – Synod Calendar-ah telh ni se, Synod Holiday-ah telh ni se” tiin a rel ta a ni. Kum 2018 Synod Inkhawmpui chuan “January ni 11 hi Kohhran Inkhawm buatsaihin urhsun taka hman ni rawh se” tih rawtna chu tha a ti a, a hman dan tur chu SEC ruahman turin a dah leh a, SEC chuan he thu hi ngaihtuahin ruahmanna siam turin Synod Worship Committee a ruat a, Synod Worship Committee ruahmanna siam chu SEC chuan a lo pawm ta a, tun thlengin Pu Buanga leh Sap Upa ten Mizoram an rawn thlen ni hi chanchintha meimit lova tihnun tan ni-ah pawmin an kohhran din tan ni atan kan hmang a ni.

Naupang Sunday School: Ni 7.1.2024 Zirtirtute leh Zirlai hming ziah dan hetiang hi a ni e.

Beginner Department:
Zirtirtu – 14; Zirlai – 47; Total – 61.

Primary Department:
Zirtirtu – 13; Zirlai – 71; Total – 84.

Junior Department:
Zirtirtu – 17; Zirlai – 79; Total – 96.

Intermediate Department:
Zirtirtu – 16; Zirlai – 73; Total – 89.

Sacrament Department:
Zirtirtu – 7; Zirlai – 26; Total – 33.

Senior Department:
Zirtirtu – 15; Zirlai – 83; Total – 98.

Zirtirtu zawng zawng – 83; Zirlai zawng zawng – 379.

Superintendent – 1; Secretary – 1.

NPSS zawng zawng – 463.

Puitling Sunday School: Ni 7.1.2024 Zirtirtute leh Zirlai hming ziah dan hetiang hi a ni e.

Zirtirtu zawng zawng: 70. (Superintendent leh Secretary te nen)

Zirlai zawng zawng: 835.

PTSS zawng zawng: 905.

Kan Kohhran atanga Pastor-a Bihar (Patna South Pastor Bial) a awm tur Pastor Andrew Lalhruaitluanga chu zanin ni 07.01.2024 kohhran inkhawmah thlahna thilpek hlan a ni a. Hetiang hi thlahna thilpek hlan dan a ni: Kohhran – Rs. 10,000; Kohhran Hmeichhia – Rs. 2,000; Kristian Thalai Pawl – Rs. 2,000 & Thuziak leh Kohhran Pavalai Pawl – Rs. 3,000.

Pastor Hruaitea hi Bungtlang South Pastor Bialah Probationary Pastor hna kum 3 thawka a awm hnuin kum 2023 Synod, Mission Venga neihah Synod Mission Board hnuaia thawh turin nemngheh a ni. Pastor Hruaitea hi B.A (English Hons.) a zawh hnuin B.D (Hindi), Allahabad-ah a zo leh a. M.Th (Old Testament) hi ATC atangin a zir zo leh a ni.

Tum lawk dan chuan ni 11.01.2024 hian a awmna tur Bial pan hian a kal ang. Kohhranhoten Pastor Hruaitea a rawngbawlna turah duhsakna kan hlan a ni.