Ni 14 April, 2024 chawlhni chawhnu inkhawmah Upa R. Lalropuia, Secretary chu hruaitu niin kan Speaker hnen atangin ‘Kristian Chhungkaw Hmelma’ tih kan ngaithla a. Pathianni Naupang Inkhawm te leh Christian Teenagers Group te pawh biak inpuiah inkhawmin speaker pawhin lawmawm a tih thu a sawi a ni.

Ni 13 April, 2024 (Inrinni) zan inkhawm atangin Kohhran hoten kan lo nghak hlelh em em Kristian Chhungkaw Campaign chu Speaker Upa C. Ngurthantluanga hovin kan tan thei a. Upa R. Lalropuia, Secretary-in inkhawm a hruai a. Upa R. Lalnghaka, Asst. Secretary-in thu a puan hnuah Kohhran hoten inrinni zana kan tih thin dan angin kan tawngtai rual a. He tawngtairualnaah hian ni 19 April, 2024 a Lok Sabha Member kan thlan tur chungchang te a bik takin thupui atan kan nei nghe nghe a ni.

Upa C. Ngurthantluangan Kristian Chhungkaw chungchang ngaihnawm takin a sawi a. Tunlai khawvela Kristian Chhungkaw hlutna leh pawimawhna te tarlangin kohhran hoten a thusawi hlawkthlak kan ti hle a ni. Kohhran Pavalai Pawl Inkhawmpui Vawi 6-na East Lungdar a neih mekah Pavalai member eng emaw zat an kal a, chuti chung chuan inkhawm kan tha thawkhat hle a ni.

Ni 4 April, 2024 zan inkhawmah kohhranhoten Kohhran Ni Pawimawha kan chhiar ‘Harhna Thlen Ni Vawi 118-na’ lawmin kan inkhawm a. Tun tum Harhna Thlen Ni hi kohhranhoten Kohhran Ni Pawimawh anga kan chhiar tan hnua vawi 40-na chiah a ni bawk a ni. Upa H. Lalthankhuman inkhawm hruaiin Pi Vanhnuaithangi chu tantu a ni a. KHB 346 ‘Aw Pathian, Nangman Chanchin Tha Min Pe’ tih kan sak hnuin Upa R. Lalropuian thupui awm sa ‘Harhna Chuan Ringtu A Tichak’ tih a sawi a ni. Inkhawm banah kohhranhoten thingpui kan inho nghal a ni.

Ni 25 March, 2024 khan Sacrament Department te chuan kum danga kan lo tih thin angin Synod Hmun Pawimawh te an tlawh a. Zirlai zingah pakhat kal lovin mi 23 an kal thei a, zirtirtute zingah mi 7 an kal thei bawk a ni. Hawla Indoor Stadium atangin zing dar 10-ah an chhuak a. Synod Office Mission Vengah tlawh tur awm hrang hrangte an tlawh kual a, chumi hnuah Synod Missionary Training Centre an tlawh leh a. Aizawl Theological College-a Biblical Garden-ah chawchhun eiin ATC hmun te an fan zawhah Youth Recreation Centre tlawhin tluang takin tlai dar 3:15-ah kan veng an lo thleng leh a ni.