Kohhran lengkhawm hi chawhma dar 11:00-ah tan niin Pu Malsawma Pautu chu hruaitu a ni a. Nilengin tui takin lengkhawmte an zai a, ruai theh hma thleng kham lo takin an zaiin an lam a ni.

Kohhranhoten Pathian hruainain kum 2023 Krismas leh 2024 Kum Thar Ruai tluang takin kan theh thei a. Krismas leh Kumthar Committee 2023 report buatsaih chu hetiang hi a ni e:

Kum Thar Ni zan inkhawm chu Upa K. Darthanga, Chairman, Kohhran Committee-in a kaihruai a, Kohhran Zaipawl ten ‘I Hmangaih Ropui Chuan’ tih hla an sa a. Upa R. Lalnghaka hnen atangin thupui ‘Kawng tha lehzual’ tih kan ngaithla a. Inkhawm banah Kohhranhote kan lengkhawm leh a, Pu PC Lalhnunan a kaihruai a ni.

Chawhnu inkhawm hi Upa F. Lalfakzualan kaihruaiin inkhawm tawngtainaa hlan turin kan Kohhran atanga missionary-a fehchhuak Nl. Lalhlimawmi a sawm a. Pi Lalnunzirin tanna hun hmangin Rev. C. Thangthuama, Bialtu Pastor-in ‘Nun Fimkhurpui’ tih thupui a sawi a. Kan Bialtu Pastor hi Chawnpui Pastor Bialah sawn a nih avangin he inkhawma a thusawi hi kan Bialtu Pastor a nih chhunga kan Biak Ina a thusawi hnuhnung ber a ni ta a ni. Kohhranhoten kum thar chibai kan buk rualin a rawngbawl lehzelna tur atan duhsakna kan hlan bawk a ni.